 |
| سعيد برخوخ |
كاينة حاجة زوينة وحاجة خايبة !!
ناس فرحانة وناس قلوبها طايبة !!
ناس معانا ولكن فنفس الوقت غايبة !!
ناس تكرهنا وناس فحبنا دايبة !!
ناس ناسيانا ولخبارنا گاع ما جايبة !!
ناس عندها حدود ومحترمة وناس سايبة !!
كاينة ناس عزيزة وغالية !!
حيت قلوبها بيضا وصافية !!
ناس بالأخلاق ديالها ديما عالية !!
ديما الفوق الفوق بحال الدالية !!
ناس دير الخير وبالمعقول غادية !!
حيت عارفة أن هاد الدنيا فانية !!
وكاين ناس لي وجهها قاسح وصحيح !!
تقول نتا مراضعين مع الذياب والتماسيح !!
الغدر والهضرة فالظهر طبعها قبيح !!
تمشي هاك وهاك على حساب الريح !!
كلامو معسول يبان ليك انسان مليح !!
ولكن هو خدام يحفر ليك فين طيح !!
هادي هي الدنيا هاك وهاك !!
ونتا غي مسافر وهاز الصاك !!
تلقا لي يكمل الطريق معاك !!
تلقا الشيطان وكذلك تلقا الملاك !!
وتعرف شحال من واحد باعك وشراك !!
وشحال من واحد بالظهر عطاك !!
انا نهضر ونكتب ونتا خاصك تفهم !!
قرا كلامي وعاود .. فكّْر مزيان وخمّْم !!
ماتيقش فبنادم بزاف وبلا ماتبقا تحلم !!
حيت فالأخير غادي تتعجب وغادي تصدم !!
حتا تعاشر وتسافر مع بنادم عاد حكم !!
الدنيا مدراسة ونتا خاصك تاخد الدروس وتتعلم !
ليست هناك تعليقات:
إرسال تعليق