مورال فالبلاد طايح أعوام وسنين ، أزماتنا أكبر من أفراحنا ، أقراحنا كتر من إنتصاراتنا ، بلادنا عاشت انتكاسات نكسة مورا أخرى ، هموم كثيرة كتبان فوجه الصغير والكبير ، فوجه الشيباني حياتو كاملة مقاتل ، فوجه طفل صغير عندو أمل فنظرو غا حلمة ودازت وسط عالم مغبون عامر ضبابة ، عشنا الأمرين فالسياسة وتهلكنا فصحتنا بأسباب تدابير وقرارات صعيبة ، فمغربنا تعلمنا المقاومة والصمود ، وقرينا نوقفو قدام الأزمات والتحديات ، نتقاتلو مع الحياة بمعيشة ديالها الصعيبة والعصيبة ، هاد الشعب من حقو يفرح ولو فرحة رمزية ، ينسى الهموم اللي غارق فيها ويعيش ولو لحظة بنشوة الإنتصار والكبرياء ، تغرمنا بالكورة من الصغر ، كبرنا معاها ، عشناها ولعبناها وتفرجنا وباقي كنتفرجو فيها ، فرحاتنا وبكاتنا ورسمناها حكاية وأسلوب حياة تخرجنا من روتين الحياة الصعب ، ربعين مليون نسمة اليوم فرحانة اللي عندو مع الكورة واللي ماعندوش غي حيت هاد البلاد فالقلب ❤️🇲🇦 حيت هي منا وحنا منها ، كنموتو عليها وبغيناها الفوق والفوق ، الوطن مسألة كبيرة والوطنية هي أهم حاجة ، ما عرفت كيفاش غايشوفو ناس من دول اخرى هاد الفرح ، وكيبان ليهم مبالغ فيه ، مي هو انتصار وثورة ضد اليأس وخيبات أمل عشناها سنين وسنين ، اليوم شفت رجال وعيالات لابسين لون أحمر من صباح ، الشوارع عامرة وتبوريشة وقشعريرة شاداني ، بكيت بالفرحة لأننا تسنيت فلاش باك لمنتخب ثمانينات القرن الماضي وفرحت غا حيث هاد الشعب يستاهل الفرحة ، كرة القدم هي أفيون الشعوب ، هي المتنفس الوحيد لهاد البلاد ، فرحت بهاد الإنتصار ضد "كندا" أكثر من الفوز ضد "بلجيكا" حيث مدرب كندا دارنا فكرشو وما دارنا فحسابو ، حگرنا ولكن علمناه ، شكرا لأي واحد ساهم فهاد الإنجاز ، من وليد الرگراكي واللعابة ، للشعب المغربي للي ضحى وسافر لقطر يدعمو البلاد .... عاش المغرب وعاش الهوس والحب لهاد الوطن الجميل 🇲🇦❤️🇲🇦
ليست هناك تعليقات:
إرسال تعليق